მიმდინარე წლის 27 აპრილს საქართველოს სოფლის მეურნეობის მეცნიერებათა აკადემიის საკონფერენციო დარბაზში აკადემიის მეცხოველეობის და ვეტერინარიის მეცნიერებათა განყოფილების ორგანიზებით გაიმართა ვეტერინარი ექიმის საერთაშორისო დღისადმი მიძღვნილი კონფერენცია თემაზე: „ზოოვეტერინარული მეცნიერების თანამედროვე გამოწვევები“. კონფერენციას ესწრებოდნენ მეცხოველეობის და ვეტერინარიის მეცნიერებათა განყოფილების წევრები: განყოფილების აკადემიკოს-მდივანი, აკადემიკოსი ჯემალ გუგუშვილი, აკადემიკოსი თენგიზ ყურაშვილი, აკადემიის პრეზიდენტის მოადგილე, სამეცნიერო განყოფილებების კოორდინატორი, აკადემიკოსი ანატოლი გიორგაძე, აკადემიური დეპარტამენტის უფროსი, აკადემიის აკადემიკოს-მდივანი ელგუჯა შაფაქიძე, აკადემიის სამეცნიერო განყოფილებების სწავლული მდივნები: ს/მ დოქტორი მარინე ბარვენაშვილი და აკადემიკოსი ლაშა დოლიძე, აკადემიის წამყვანი სპეციალისტი ქეთევან ჭიპაშვილი და მოწვეული სტუმრები: საქართველოს გარემოს დაცვისა და სოფლის მეურნეობის სამინისტროს სურსათის ეროვნული სააგენტოს უფროსის მოადგილე, ვეტერინარიის დოქტორი ვასილ ბასილაძე, სურსათის ეროვნული სააგენტოს უფროსი, ვეტერინარიის მეცნიერებათა დოქტორი დემნა ხელაია და მისი მოადგილეები: ვეტერინარიის მეცნიერებათა დოქტორი დავით გოდერძიშვილი და ვეტერინარიის დოქტორი იოსებ მენთეშაშვილი, საქართველოს ვეტერინარ ექიმთა გაერთიანებული ასოციაციის პრეზიდენტი ლალი ვაშაკიძე, სამცხე-ჯავახეთის სახელმწიფო უნივერსიტეტის პროფესორი, ვეტერინარიის მეცნიერებათა დოქტორი ლევან მაკარაძე, შპს „ბიოტექსი“-ს დირექტორი ნიკოლოზ ზაზაშვილი, შპს „როქი“-ს დირექტორი დავით ბოსტაშვილი, აგროექსპერტთა ასოციაციის თავმჯდომარის მოადგილე მიხეილ ჭიჭაყუა, შპს „ბიოტექსი“-ს წამყვანი სპეციალისტი მარინა ჭიკაიძე, აკადემიის ეროვნული კოორდინატორი, სოფლის მეურნეობის დოქტორი მაია ფეიქრიშვილი, აგრარული უნივერსიტეტის პროფესორი, სოფლის მეურნეობის დოქტორი ნაირა მამუკელაშვილი და ვეტერინარი ექიმები: ირაკლი თათრიშვილი და ალექსანდრე ყურაშვილი. 
კონფერენცია გახსნა და დამსწრე საზოგადოებას მისასალმებელი სიტყვით მიმართა საქართველოს სოფლის მეურნეობის მეცნიერებათა აკადემიის მეცხოველეობის და ვეტერინარიის მეცნიერებათა განყოფილების აკადემიკოს-მდივანმა, აკადემიკოსმა ჯემალ გუგუშვილმა. მისალმების შემდეგ აკადემიკოსმა ჯ. გუგუშვილმა ისაუბრა ვეტერინარიის როლზე ცხოველთა ჯანმრთელობის უზრუნველყოფის და ამ მხრივ ქვეყანაში მეცხოველეობის მაღალხარისხიანი პროდუქციის წარმოების გაზრდის საქმეში. იგი ასევე შეეხო ვეტერინარიისარსებულ მდგომარეობასა და პრობლემებს, რომელთა გადაჭრაც საგრძნობლად გააუმჯობესებს ქვეყანაში ვეტერინარული კეთილსაიმედოობის დონეს. შემდგომ სიტყვა გადაეცა აკადემიკოს თენგიზ ყურაშვილს, რომელმაც გააგრძელა კონფერენციის მუშაობა.
კონფერენციის მონაწილეებს სიტყვით მიმართა და კონფერენციის ორგანიზატორებს მოწვევისათვის მადლობა გადაუხადა საქართველოს გარემოს დაცვისა და სოფლის მეურნეობის სამინისტროს სურსათის ეროვნული სააგენტოს უფროსის მოადგილემ, ვეტერინარიის დოქტორმა ვასილ ბასილაძემ. თავის გამოსვლაში მან აღნიშნა, რომ ვეტერინარი ექიმის საერთაშორისო დღე, რომელიც იმართება ყოველ წელიწადს აპრილის ბოლო შაბათს, დაარსებულია მსოფლიო ვეტერინარული ასოციაციის მიერ (World Veterinary Association, WVA) 2000 წელს. მისი მიზანია მთელ მსოფლიოს აუწყოს ვეტერინარი ექიმის წვლილი ცხოველთა ჯანმრთელობის გაუმჯობესების და კეთილდღეობის უზრუნველყოფის და მოსახლეობის ჯანმრთელობის შენარჩუნების მიმართულებით. მომხსენებელმა ასევე აღნიშნა, რომ ვეტერინარი ექიმის პროფესია მუდამ პატივსაცემ პროფესიებს შორის მოიაზრებოდა. დღეს, ვეტერინარი ექიმები მუშაობენ ვეტერინარულ კლინიკებში, სასოფლო-სამეურნეო დანიშნულების საწარმოებში, ზოოპარკში, მოკლედ ყველგან სადაც კი ცხოველები სამედიცინო დახმარებას საჭიროებენ. ვ. ბასილაძემ კონფერენციის მონაწილეებს კიდევ ერთხელ აუწყა ცნობილი ფრაზა, რომ „მედიცინა კურნავს ადამიანს, ხოლო ვეტერინარია კაცობრიობას“. კონფერენციაზე მოხსენებებით წარსდგნენ: ვეტერინარი ექიმი ალექსანდრე ყურაშვილი, რომლის მოხსენება ეხებოდა თემას: „რისკების შეფასება და ეპიზოოტიების ცდები ვეტერინარულ ჯანდაცვაში“; ვეტერინარიის მეცნიერებათა დოქტორმა, პროფესორმა ლევან მაკარაძემ გააკეთა მოხსენება თემაზე: „სწავლება-სწავლის ინოვაციური მეთოდები და მისი მნიშვნელობა“; სოფლის მეურნეობის დოქტორი მაია ფეიქრიშვილის მოხსენების თემა იყო: „ფუტკრის ოჯახებით მკურნალობა (აპითერაპია)“, აკადემიკოსმა თენგიზ ყურაშვილმა კი წარმოადგინა მოხსენება თემაზე: „საქართველოში ზოგიერთი ვექტორული დაავადებების რეგიონალური გავრცელება ძაღლის პოპულაციაში“. თითოეულმა მოხსენებამ მსმენელთა დიდი ინტერესი და მოწონება დაიმსახურა. თემების ირგვლივ დაისვა მრავალი შეკითხვა, რომელზეც მომხსენებლებმა კომპეტენტური პასუხები გასცეს.კონფერენციის მუშაობა შეაჯამა მეცხოველეობის და ვეტერინარიის მეცნიერებათა განყოფილების აკადემიკოს-მდივანმა, აკადემიკოსმა ჯემალ გუგუშვილმა. მან მადლობა გადაუხადა მომხსენებლებსა და დამსწრე საზოგადოებას მობრძანებისათვის და აღნიშნა, რომ მსგავსი კონფერენციები ხელს შეუწყობს დარგში არსებული პრობლემური საკითხების წინ წამოწევას და მათი გადაჭრის რაციონალური გზების გამონახვას.